भगवद गीता अध्याय 17 ( श्रद्धात्रयविभागयोग ) bhagwat geeta adhyay 17 in marathi

भगवद गीता अध्याय 17 श्लोकआणि अर्थ

                 भोजनही सर्वांना आपापल्या प्रकृतीप्रमाणे तीन प्रकारचे प्रिय असते. आणि तसेच यज्ञ, तप व दानही तीन तीन प्रकारची आहेत. त्यांचे हे निरनिराळे भेद तू माझ्याकडून ऐक.

                सत्त्व, रज, तम या तीन प्रकृतीच्या लोकांचे भोजनही वेगवेगळ्या तीन प्रकारचे असते. ते यज्ञ म्हणजे कर्म तीन वेगवेगळ्या प्रकारे करतात, त्यांचे तप म्हणजे अध्ययन तीन वेगवेगळ्या प्रकारचे असते. ते दान म्हणजे त्याग तीन वेगवेगळ्या प्रकारे करतात, कारण प्रकृतीवर जसे संस्कार होतात तसे त्यांचे गुणही तयार होत असतात. गवयाचे पोर रडतानाही सुरातच रडते, असे म्हणतात, त्याप्रमाणे जसे पूर्वकर्म असेल व जसे जन्मानंतर संस्कार झाले असतील, त्याप्रमाणे स्वभाव तयार होतो.

                 जसा स्वभाव असेल तशी श्रद्धा प्राप्त होते. जशी श्रद्धा असेल त्याप्रमाणे आचरण केले जाते. जसे आचरण असेल त्या प्रमाणे कर्मफळ प्राप्त होते. भोजन, यज्ञ, तप, दान या गोष्टी दैनंदिन जीवनात अतिशय महत्त्वाच्या आहेत. ज्याप्रमाणे अध्ययन असेल, त्याग असेल, कर्म असेल त्याप्रमाणे चरितार्थाचे साधन प्राप्त होते.

               जसे चरितार्थाचे साधन असेल, त्याप्रमाणे भोजन प्राप्त होते. काही लोक सात्त्विक आहार घेतात, काही लोक राजस आहार घेतात, तर काही लोक तामस आहार घेताना दिसतात. काही लोक शाकाहारी असतात, तर काही लोक मांसाहारी असतात. काही लोक उपवास करतात.