पांडुरंग वामन काणे मराठी माहिती pandurang vaman kane information in marathi

             पांडुरंग वामन काणे च्या मते, दुसरीकडे जे कुठेच मिळणार नाही, ते सगळे धर्मशास्त्रात मिळते धर्मशास्त्र हा एक विशाल समुद्र आहे, ज्यात सगळे काही आहे. ते नेहमी एका लहानशा भाड्याच्या खोलीत राहत असत. पुस्तकांनी भरलेल्या कपाटांमध्ये स्वतःच्या धुंदीत धर्मशास्त्राच्या इतिहासात ते दंग होऊन जात. हे कामच त्यांच्या जीवनाचे अंतिम ध्येय होते.

               ‘धर्मशास्त्राचा इतिहास ६ हजार पानांचा मूळ इंग्रजी ग्रंथ लिहिण्याची कारणे म्हणजे पाश्चात्य विद्वानांना प्रभावित करणे. इंग्रजांचा हिंदू धर्माबद्दल असलेला पक्षपाती दृष्टिकोन बदलणे. दुसरे म्हणजे इंग्रज व पाश्चात्य विद्वान असा अपप्रचार करीत होते की, ‘भारताची कुठलीच प्राचीन संस्कृती नाही.

            हिंदूंनी केवळ काही तरी अपप्रचार चालविला आहे. लॉर्ड मेकॉलेने संस्कृत साहित्याबद्दल एकदा टीका केली होती की, ‘संस्कृत साहित्य हे एका कपाटाची बरोबरी करण्याइतकेही नव्हते. या सगळ्या टीकेमुळे, दृष्टिकोणामुळे पांडुरंग वामन काणे हे पेटून उठले. त्यांनी या सर्वांना उत्तर देऊन, हिंदू धर्माविषयीचा जगाचा दृष्टिकोण बदलण्याचा विडा उचलला. तशी शपथ घेतली.

            यासाठी आपली वकिली सोडली. आयुष्याची २५ वर्षे निष्ठेने रात्रंदिवस सतत कठोर मेहनत केली. यासाठी जर्मन व फ्रेंच भाषा शिकल्या. भारतीय विद्या व शास्त्राला विदेशी विद्वानांपर्यंत पोहोचवून त्यांचा चुकीचा दृष्टिकोण दूर करून, हिंदू धर्म संस्कृतीचा सत्य इतिहास जगाच्या प्रकाशात आणण्यासाठी ६००० पानांचा ‘धर्मशास्त्राचा इतिहास’ इंग्रजी भाषेमध्ये लिहून काढला. या तपश्चर्येने ते आधुनिक ऋषी झाले.

        आपल्या ग्रंथात त्यांनी शिलालेख, काव्य, नाटके आणि अन्य साधनसामग्रीच्या आधाराने हे सिद्ध केले की, ‘हिंदू धर्माचा विकास हा ऋग्वेद काळापासून होतो आहे. या प्रदीर्घ, वैविध्यपूर्ण काळामध्ये अनेक आघात सहन करून, पचवून हिंदू धर्म अधिकाधिक शक्तिशाली व परिपक्व होत आलेला आहे.’